18 чэрвеня 2016 г. – 70 гадоў з часу заснавання (1946 г., адкрыты для наведвальнікаў у 1948 г.) Кобрынскага ваенна-гістарычнага музея імя А. В. Суворава
Кобрынскі ваенна-гістарычны музей імя А. В. Суворава заснаваны 18 чэрвеня 1946 года. Ініцыятарам стварэння і першым дырэктарам музея быў Аляксей Міхайлавіч Мартынаў (1904–1999).
Экспазіцыя музея размясцілася ў доме, які ў XVIII ст. належаў вялікаму рускаму палкаводцу Аляксандру Васільевічу Сувораву і дзе ён жыў у 1797-м і 1800-м гадах. Дом не раз змяняў сваіх гаспадароў, паступова будынак старэў. Пасля Вялікай Айчыннай вайны аднаўленне дома і збор экспанатаў вяліся паралельна. Шмат цяжкасцей давялося пераадолець дырэктару і адзінаму тады супрацоўніку музея А. М. Мартынаву. Аднак да канца 1947 года рамонтныя работы былі завершаны, а ў фондах налічвалася 663 экспанаты.
8 лістапада 2016 г. – 60 гадоў з часу адкрыцця Музея абароны Брэсцкай крэпасці, састаўной часткі мемарыяльнага комплексу “Брэсцкая крэпасць-герой” (1956)
Музей гераічнай абароны Брэсцкай крэпасці (так пачаткова ён называўся) адкрыты 8 лістапада 1956 года згодна Дырэктыве глаўкома Сухапутных войск Маршала Савецкага Саюза І. С. Конева ад 17 ліпеня 1956 года. У першы дзень работы яго наведалі каля 2500 чалавек. Экскурсаводамі тады былі Таццяна Канстанцінаўна Ніканава, Іван Трафімавіч Касых, Міра Маркаўна Слепакова, Уладзімір Піліпавіч Гаўрасаў.
27 сакавіка 2015 г. – 70 гадоў з часу прыняцця рашэння аб арганізацыі ў г. Брэсце краязнаўчага музея (Брэст; 1945; заснаваны 11 чэрвеня 1945 г., першая часовая выстава створана ў 1950 г.)
Рашэнне аб неабходнасці адкрыцця гістарычнага музея было прынята Брэсцкiм аблвыканкамам 27 сакавiка 1945 года, адпаведны запыт накіраваны ў Савет Народных Камісараў БССР. 11 чэрвеня 1945 года Пастановай СНК БССР было дазволена аднавіць абласныя гісторыка-краязнаўчыя музеі ў гарадах Беларусі, у тым ліку ў Брэсце. Брэсцкi абкам КП(б)Б 30 жнiўня 1945 года прыняў пастанову аб зборы i вывучэннi матэрыялаў пра Вялiкую Айчынную вайну на тэрыторыi вобласцi i стварэннi абласнога гiстарычнага музея.
4 лютага 2014 г. – 25 гадоў з часу адкрыцця музея “Выратаваныя мастацкія каштоўнасці” (1989), філіяла Брэсцкага абласнога краязнаўчага музея
Музей “Выратаваныя мастацкія каштоўнасці” адкрыты 4 лютага 1989 года.
2014 г. – 85 гадоў з часу заснавання (1929) Баранавіцкага краязнаўчага музея
Баранавіцкі краязнаўчы музей – адзін са старэйшых музеяў Брэсцкай вобласці, старэйшая ўстанова культуры ў горадзе. Музей у горадзе Баранавічы Брэсцкай вобласці быў створаны ў кастрычніку 1929 года па ініцыятыве прафесара польскай гімназіі Леанарда Турскага. Да 1939 года музей дзейнічаў як павятовы і меў краязнаўчую накіраванасць.
11 верасня 2013 г. – 35 гадоў з часу заснавання (1978; адкрыты ў 1986) Лунінецкага краязнаўчага музея
Лунінецкі краязнаўчы музей заснаваны паводле пастановы Бюро ЦК КПБ ад 11 верасня 1978 года.
24 ліпеня 2013 г. – 20 гадоў з часу заснавання (1993) музея-сядзібы “Пружанскі палацык”
“Пружанскі палацык” – музей-сядзіба, заснаваны ў 1993 годзе ў г. Пружаны Брэсцкай вобласцi паводле рашэння Пружанскага райвыканкама ад 24 лiпеня 1993 года на базе збораў клуба “Спадчына” пры гарадскім Доме культуры.
16 сакавіка 2013 г. – 20 гадоў з часу адкрыцця (1993) для наведвальнікаў Івацэвіцкага гісторыка-краязнаўчага музея
16 сакавіка 1993 года Івацэвіцкім райвыканкамам Брэсцкай вобласцi было прынята рашэнне № 72 аб адкрыцці ў раёне гісторыка-краязнаўчага музея на базе народнага музея піянера-героя Мікалая Гойшыка.
2 сакавiка 2012 г. – 30 гадоў з часу адкрыцця ў Брэсце археалагічнага музея “БЯРЭСЦЕ”
2 сакавiка 2012 г. – 30 гадоў з часу адкрыцця ў Брэсце археалагічнага музея “БЯРЭСЦЕ”, філіяла Брэсцкага абласнога краязнаўчага музея, адзінага ў Еўропе музея сярэдневяковага ўсходнеславянскага горада (1982; заснаваны 18.08.1972).